MARIA DO CEO: SALARIU MÉDIKU TIMOR OAN HANESAN DEIT

Ministra Saude (MS) Maria do Ceo, informa, rejime salarial ba mediku  Timor oan sira hanesan deit,  laiha ida ba eskola iha Cuba mai a’as liu fali hirak ne’ebé iha Timor-Leste.

“Laiha ida ba eskola iha Cuba mai salariu a’as liu fali seluk, rejime hotu-hotu hanesan,”esplika MS  Maria do Ceo,   ba jornalista iha Palasiu Governu, Tersa (02/08), hodi responde preokupasaun balun ne’ebé hato’o fontes mediku Timor oan husi Cuba ninian.

Kona-ba estandar salariu  mediku sira nian? Maria do Ceo hatan, iha lei hatete iha ne’eba, enkuadramentu ba sira, ba sira  ne’ebé senior no junior  ne’e iha nivel salarial ne’e iha hotu ona.

“La fo impaktu, buat ne’e la’o tuir  lei ne’e,  fo impaktu halo nusa,  nia iha ne’eba hatene nia direitu no dever no obrigasaun ne’e saida? ne’e la’o tuir lei deit,”dehan Maria do Ceo.

Antes ne’e, médikus espesialista Timor oan lubuk ida ne’ebe hala’o hela knaar iha Hospital Nacional Guido Valadares ho hospital referal sira iha Munisipiu Baucau, Suai, Maubisse ho Maliana, ‘desanima’ tebes ho atensaun minimu ne’ebe Governu fo, liu husi Ministeriu Saude.

Medikus espesialista Timor oan ne’ebe Estadu investe hodi haruka sira ba hasai estudu espesialista iha rai liur, la dun kontenti, tanba sira nia salariu no regalias seluk profesional nian hanesan deit mos ho médiku jeral sira.

Informasaun ne’ebe JNDiário hetan husi mediku espesialista balun ne’ebe haknaar hela iha HNGV ne’ebe lakohi atu publika nia identidade, reafirma katak, mediku espesialista barak iha tempu badak sei husu atu rezigna husi sira nia serbisu, tanba ladun satisfeitu ho salariu ne’ebé Governu konsidera ba sira hanesan mos ho mediku jeral.

Reprezentante povu iha Parlamentu Nasional (PN) husu ba Governu, li-liu ministeriu kompetente atu tau importansia ba medikus espesialista sira nia salariu no regalias seluk ne’ebe merese sira hetan atu bele fasilita sira sebisu diak liu tan.

Xefi Bankada Frenti-Mudança (FM), José Luis Guterres, hateten, definisaun politika salariu oras ne’e sei iha problema, tanba ne’e maka husu ba Governu hodi tau importansia ba medikus espesialista sira hodi nune’e povu Timor ne’ebe mak moras la persiza hodi ba rai liur.

“Hau hanoin ita iha problema ida ne’ebe boot ne’ebe presiza halo refleksaun sobre politika salarial, Estado tomak presiza haree salarial ne’ebe tenke kompensa ema nia esforsu tuir ema nia matenek no mos ema nia esforsu serbisu durante tempu kleur ona,” hateten Deputadu José Luis Guterres.avi/mia

Jornal Nacional

Publicada por TIMOR AGORA