domingo, 28 de agosto de 2016

Setembru Eleisaun Suku, Feto 100 Prontu Kompete Iha Elisaun Sukus


Feto Potensial nain 200 ne’ebe hetan ona formasaun kona ba politika, iha deit nain 100 mak deklara pronto kandidata an ba iha xefe suku iha elisaun suku tinan ne’e.

Diretora Fundasaun Patria, Laura Pina hateten feto potensial nain 200 husi munisipio hotu mak hetan ona formasaun husi organizasaun no iha nain 100 mak deklara prontu atu kandidata aan.

“Feto nain 100 mak prontu ona hodi kompete iha eleisaun suku, manan ka lakon depende ba rezultado votasaun,” nia hateten iha konferensia imprensa  iha salaun FOKUPERS Farol, Dili.

“Ami nia hakarak iha 442 sukus ne’e iha kandidata feto tanba lei asegura.” 

Tuir kalendariu ne’ebe governu fo sai ona, katak eleisaun suku sei akontese iha fulan setembru.

Tuir lei suku no. 9/2016 artigu 44 no 65, katak minimu husi kandidatu nain rua ne’e, ida tenke feto, nune’e mos ba xefe aldeia.

Alende ne’e, nia hateten sei iha delegada feto ida husi 2225 aldeias no reprezentante joventude feto ida husi 442 sukus ne’ebe sei tuur iha konselho sukus. 

Entretantu porta voz Komisaun 100% Hau prontu, Yasinta Lujina hateten presiza apoia husi entidade hotu, liu-liu administrador munisipius inklui atual lideransa sukus ajuda hodi identifika feto sira iha nivel suku no enkoraja atu sira bele kandidata aan.

“Tanba komisaun laiha kapasidade atu kobre area hotu, entaun husu ema hotu nia suporta enkoraja feto sira nia kandidatura,” nia hateten.

“Tuir lei la’os nain 100 deit maibe nain 442, entaun presiza esforsu maka’as liu tan iha fulan ida ikus ne’e.”

Feto nia kandidatura sei menus, tanba tuir nia kultura sei sai bareira bo’ot ba iha feto nia involvimentu, tanba iha suku balun sosiedade sei fiar kultura.

“Katak jerasaun ida  mak tenke ukun nafatin, labele fo ba jerasaun seluk maske sira iha kapasidade no abilidade atu ukun,” nia dehan.

Iha parte seluk feto potensial husi suku Seloi Kraik munisipio Aileu, Celestra Fatima deklara katak nia prontu atu kandidata aan ba xefe suku, ho intesaun hakarak halo mudansa iha nia suku laran.

“Hau nia suku iha potensial bo’ot ba iha turismu komunitaria, maibe hau haree lideransa sira agora ladun tau importansia,” nia hateten.

Alende ne’e feto husi suku Maumeta postu administrative Bazartete, munisipio Liquisa, Ana Rosaria da Costa, nia hakarak kandidata aan ba xefe suku ba periodu ida ne’e tanba hakarak kontribui ba dezenvolvimentu.

“Hau hakara kontribui hau nia hanoin no energia hodi dezenvolve hau nia suku iha futuru,” nia hateten.

Iha parte seluk, Prezidente Rede Feto, Judit Ximene apela ba ema hotu atu fo votu ba kandidatu feto sira, tanba esperiensia hatudu feto nia lideransa iha mudansas.

“Ezemplu iha suku Soba no suku Fahi-Soi dezenvolvimentu la’o maka’as, tanba inan feto sira mak lidera, sira preokupa liu edukasaun no saude ba labarik, enkuantu mane sira preokupa liu ba estrada no ponte,” nia hatutan.

The Dili Weekly

Publicada por TIMOR AGORA


Litoral Centro – Comunicação e Imagem
____________
INFORMAÇÃO SEM FRONTEIRAS!

Nenhum comentário:

Postar um comentário