Nilton Gusmão Garante Ezisténsia LFA

DILI, (ANTIL) – Prezidenti Liga Futeból Amadora (LFA), Nilton Gusmão garante katak LFA sei la-mate tanba, iha ona ninia klamar.

“Iha reuniaun ho prezidenti klubu sira, ha’u deklara dala barak ona katak LFA nia kamar iha ona. Nia klamar atu ense iha isin ida para atu bele la’o no la’o ba beibeik. Sei iha jerasaun atu kontinua atividade ida ne’e,” Nilton dehan ba bainaka sira iha seremónia “Gala Anual de Liga Futeból de Timor-Leste” iha Timor Plaza, Kuarta, (10/8) kalan.

Nia haktuir iha inísiu, ema hotu-hotu liu-liu prezidenti klubu sira dúvida ho implementasaun LFA iha Timor tanba esperiénsia hatudu dala barak ona katak torneiu ida laiha nia rohan.

“Ha’u nunka haluha kestaun ida ne’e. Sira koloka dúvida katak Liga ne’e bele la’o ka lae? Tanba istória komprova nune’e, kada kampionatu ne’ebé maka ita halo, ninia rohan laiha. Kada torneiu ne’ebé maka ita halo, ninia ninin laiha. Ida ne’e dezanima tiha klubu sira atu ho sériu investe iha desportu,” Nilton informa.

Tanba ne’e, nia dehan, iha momentu ida sira konvense malu katak la’ós LFA maka sei halo susesu maibé klubu sira maka tenki lori susesu ba iha eventu LFA ida ne’e. Ikus mai, Nilton tenik, susesu ne’e akontese duni apezar iha defikuldade bar-barak liu-liu infraestrutura desportu. Só úniku kampu futeból ba kompetisaun futeból primeira divizaun no segunda divizaun.

“Iha okaziaun kalan konvíviu ida ne’e, ha´u husu ba Primeiru Ministru, Dr. Rui Maria de Araújo, atu aposta hela infraestrutura desportiva en-jerál. Tanba, sosiedade ida ne’e presiza prátika desportu iha sira nia moris lor-loron. Ho desportu fó saúde ne’ebé di’ak. Ho desportu kria unidade no ho desportu ita hasoru malu,” prezidenti LFA haklaken.

Futeból, tuir nia, buat ida ne’ebé importante no futeból nu’udar buat ida ne’ebé atrai ema barak nia antesaun, tan ne’e presiza hotu-hotu nia apoiu para atividade ne’e bele la’o ho di’ak.(jornalista: Xisto Freitas; editora: Rita Almeida)

Foto: Prezidenti Klubu Futebol AD SLB Laulara, Xanana Gusmão, intrega prémiu ba mellór jogadór iha LFA.

Lee mos iha ANTIL

http://antil.tl/baucau-no-maliana-kandidatu-uma-nain-super-tasa/

Publicada por TIMOR AGORA