terça-feira, 2 de agosto de 2016

Governu promove Semináriu Internasionál Justisa

Governu liu hosi Ministériu Justisa, halo parte ona iha organizasaun hosi Semináriu Internasionál, kona-ba “Tribunál Estadu Direitu”, ne’ebé hala’o iha Salaun Ministériu Negósiu Estranjeiru no Koperasaun, Dili, hosi loron 27 – 29 jullu.

Eventu refere, halibur juis, profesór universitáriu, advogadu nomós jurista hosi nasaun Lian Portugés sira iha mundu tomak, hodi debate kestaun kona-ba Estadu Direitu, independénsia hosi poder judisiál no polítika, sistema ho jestaun judisiál nian.

Iha serimónia abertura, Primeiru ministru Rui Maria de Araújo konsidera katak Semináriu ne’e sei tatoli “ba ema hothotu kona-ba relevánsia institusionál ne’ebé bot, liu-liu ba ita-ninia nasaun foun Timor-Leste”.

Dehan tan katak povu Timór bele sente orgullu “karik konsege kria infraestrutura instituisaun nomós serbisu importante nian, ba Estadu Demokrátiku soberanu ida ne’ebé naturalmente halo parte ba iha instituisaun justisa”, no haktuir hikas katak “ita kontinua serbisu hodi hadia nomós hametin ida ne’e”.

Durante loron rua dahuluk, majistradu hosi Angola, Brazil, Kaboverde, Guiné-Bissau, Makau, Mosambike, Portugal, São Tomé e Príncipe ho Timor-Leste, halo parte ona iha paineis debate haat. Iha loron datolu no ikus hosi Semináriu refere, iha mos reuniaun hosi Asembleia Jerál Uniaun Internasionál Juis Lian Portugés nian.

Halo mos debate kona-ba reforma hosi VI Governu Konstitusionál ba setór lejislativuno justisa.

Inklui mos investigasaun kona-ba normalizasaun no armonizasaun lei, ne’ebé oras ne’e daudaun hala’o hosi Komisaun ba Reforma Lejislativa no Setór Justisa nian.

Primeiru ministru hatutan tan katak, organizasaun hosi sistema judisiál presija atu kontinua dezenvolve ho forma ida ne’ebé “hakbesik-aan liu ba iha tribunál populasaun nian”, hodi fó ba sira “persesaun justisa efetiva”.

Governu apoia hodi hametin liu tan, la’os de’it rekursu umanu maibé mos teknolojia hosi setór refere, atu nune’e bele halo serbisu ho kualidade no tuir prazu ne’ebé determina.

Primeiru ministru hato’o parabéns ba partisipante hosi Semináriu ne’e no reforsa liu kona-ba “importánsia hosi majistradu no funsionáriu justisa nian hothotu, inklui sira-ninia papel altu nivel ba iha serbisu interese nasaun no sidadaun nian”.

SAPO TL h Governu Timor-Leste

Publicada por TIMOR AGORA

Nenhum comentário:

Postar um comentário