POLISIA HURLELE JORNALISTA

Polisia Nasional Timor Leste (PNTL) husi Unidade Polisia Tranzitu (Poltraz) na’in rua halo agresaun fiziku (basa-red)Jornalista fotografer, Jeronimo A. da Silva husi media nasional Jornal Business Timor, bainhira hala’o hela knaar jornalismu nian.

Agresaun fiziku hasoru fotografer Jeronimo A. da Silva, akontese kuaze iha oras tuku 12:00 Otl iha area Colmera, Segunda (25/07/2016).

Akontesimentu ne’e mosu bainhira vitima hasai foto iha momentu poltraz halo patrulha haree kareta tanki lima (5) tula mina para hela iha Colmera, poltraz tun hodi check dokumentus, inklui check mos dokumentus Taxi ne’ebe para iha estrada klaran.

“Ida fali hetan ha’u hakbesik mai nia mai basa kedan ha’u, no hateten nune’e, nusa ó hasai fali foto…?? ha’u hatan, ha’u Jornalista, nusa mak ó basa fali ha’u, haksesuk malu namanas hela ida fali mai husi ne’ebe ha’u la haree basa tan ha’u,”deklara vitima, Jeronimo ba Jornalista sira iha edifisiu Polisia Distritu Dili.

Nia hatutan, iha momentu ne’eba nia parte hamrik hela iha estrada Colmera parte sorin hasai foto, momentu polisia tranzitu husu hela dokumentus ba kareta iha fatin publiku, nudar  jornalista ninia servisu tenke foti foto iha momentu ne’ebe deit no iha fatin ne’ebe deit satan iha fatin publiku.

Hatan ba kestaun ne’e, Komandante Jeral Interinu, Komisariu Faustino da Costa hatete, hasai foto iha fatin publiku la’os bandu, maibe dala ruma presija iha liña kordenasaun, tanba iha ema balun hasai foto publika imediata iha media sosial sira.

“Kestaun ida  ne’e hanesan ne’e, husu ba ita bo’ot sira wartawan ou Jornalista hotu iha situasaun balun ne’ebe iha problema balun ba ita mak ne’e, dala ruma polisia halo hela servisu balun hasai tiha publika emediatu ne’e la’os bandu,”esklarese Komisariu Faustino. Eus

Jornal Nacional

Publicada por TIMOR AGORA