PROBLEMA MERENDA ESKOLAR…!!!

Jornal Nacional, editorial

 

Programa merenda eskolar ba estudante sira ensinu baziku iha teritoriu timor laran tomak iha tinan hirak ikus nee sai problema tamba programa nee komesa lao la normal, lakon mosu.

Merenda eskolar nudar programa prioriedade Governu Aliansa Maioria Parlamentar ho objektivu atu labarik sira han hahan nebe eskola prepara ho nutrisaun atu nunee evita labarik sira labele hamlaha wainhira tuir prosesu apredizajen iha eskola.

“Ha’u preokupa kona-ba merenda eskola ne’ebé dalaruma fulan ida mai, no fulan ida paradu, dalaruma osan mak mai de’it, foos laiha, ida ne’e programa ne’e atu la’o oinsa,” inan aman.

Problema nee laos deit preokupasaun inan aman estudante sira nian maibe Presidente Republika mos preokupa tan nee husu ona ba Xanana Gusmão nebe kria programa merenda eskolar nee atu halakon tiha tamba programa nee diak maibe implementasaun mak ladun diak.

“Merenda eskolar ne’e, to’o agora ha’u moe atu ko’alia, ha’u lahatene aban bainrua ita bele rezolve ka la’e, mas problema ida ninia implementasaun ne’e duvidozu,” Taur Matan Ruak.

Los duni senhor Presidente Republika, programa merenda eskolar nee lao hanesan ema ain kadik, lakon mosu, iha eskola balu programa nee lao diak, iha eskola balu fali lao ladun diak no eskola barak mak kuaze lahetan merenda eskolar.

Nunee mos preokupasaun seluk mak programa merenda eskolar atu mereda deit iha eskola maibe realizasaun laos merenda eskolar maibe fo han fali labarik sira iha eskola nebe asves halo labarik sira bosu hodi provoka matan dukur nebe implika ba prosesu apredizajen.

Agora preokupasaun Presidente Republika nee mos prietenente duni maibe labele hanoin  katak programa nee mak ladiak, programa nee diak maibe falta jestaun nebe diak mak implika ba programa sira nee.

Publiku apresia programa merenda eskolar, razaun labarik barak mak ba eskola ho kabun mamuk, falta nutrisaun tan nee labarik sira difisil tebes absorve materia nebe profesor sira fo.

Agora atu halakon programa nee ka kontinua nee dezisaun governu, Presidente Republika sujere deit. Importante iha nee laos Programa mak ladiak maibe jestaun mak ladun diak hodi sai problema.

Ne’ebe se jestaun mak ladiak nee governu iha kompetensia atu hadia, labele fo kulpa ba programa nee, programa nebe diak oinsa mos se ema sira iha ministeriu laiha kapasidade atu jere maka programa ‘fica com nome’  hela deit naran, laiha realizasaun.*

Publicada por TIMOR AGORA