PR TAUR HUSU XANANA GUSMÃO HALAKON MERENDA ESKOLAR

Prezidenti Repúblika (PR), Taur Matan Ruak informa katak, nia husu ona ba eis Primeiru Ministru (PM), Kay Rala Xanana Gusmão atu halakon tiha merenda eskolar ne’e, tanba programa ne’e, hamosu problema barak ba eskola sira ho Governu.

“Ha’u mo’e ko’alia kona-ba merenda eskolar ne’e, merenda eskolar ne’e, ita halo programa ne’ebé ita rasik lahatene implementa. Ha’u hateten ba maun Xanana katak, merenda eskolar ne’e, di’ak liu halakon tiha,” informa PR Taur Matan Ruak bainhira diálogu ho komunidade sira iha Suku Fahisoi no Manukasa Sábadu (23/07).

Taur Matan Ruak hatutan katak, programa merenda eskolar ne’e, hanesan mehi ida ne’ebé tenki implementa, maibé lahatene nia lala’ok implementasaun.

“Merenda eskolar ne’e, to’o agora ha’u moe atu ko’alia, ha’u lahatene aban bainrua ita bele rezolve ka la’e, mas problema ida ninia implementasaun ne’e duvidozu,” katak Taur Matan Ruak.

Tanba ne’e mak Xefi Estadu ne’e konsidera programa merenda eskolar ne’e hanesan moras kánkru ida ne’ebé la fasil atu rezolve.

Xefi Estadu ne’e mós dehan, ida ne’e la’os problema ida ne’ebé Diretur eskola sira mak atu rezolve, tanba problema ne’e ultrapasa sira nia kapasidade.

“Imi ki’ik ne’e ko’alia ema atu rona imi ka, Prezidenti de’it ko’alia ema la rona, satan imi. Husi Ministru mai to’o profesores no inan aman sira, tempu oin mai tenki halo hotu servisu para haree solusaun ba problema ida ne’e,” katak Taur Matan Ruak.

Taur Matan Ruak afirma mós katak, kestaun mak la’os Ministeriu Edukasaun mak la halo esforsu.

“Problema edukasaun ne’e, problema ida ke todan, Suku Timor laran ne’e, ha’u vizita hotu ona, hela oituan de’it. Ita iha professor besik rihun 20, ita iha estudante besik rihun 400, maibé orsamentu kada tinan ba Ministériu Edukasaun ne’e ki’ik liu,” dehan Taur Matan Ruak.

Entretantu preokupasaun konaba problema iha merenda eskolar ne’e levanta husi professor Mouzinho Araújo katak, merenda eskolar ne’e, mosu hanesan mehi deit, tanba mosu lakon-mosu lakon.

“Ha’u preokupa kona-ba merenda eskola ne’ebé dalaruma fulan ida mai, no fulan ida paradu, dalaruma osan mak mai de’it, foos laiha, ida ne’e programa ne’e atu la’o oinsa,” katak nia.

To’o nutísia ne’e fó sai ba públiku, Jornal ne’e seidauk hetan konfirmasaun husi Ministériu  Edukasaun ne’ebé tutela ba programa merenda eskolar.cos

Jornal Nacional

Publicada por TIMOR AGORA