Horta promete katak Marcelo sei "simu ho entuziásmu" hanesan festeju ba selesaun iha Timor

Eis-Prezidente timoroan José Ramos-Horta transmite iha horisehik konvite ida ba Prezidente portugés atu vizita Timor-Leste, nia garante katak Marcelo Rebelo de Sousa sei "simu ho entuziásmu" hanesan  festeju, iha nasaun, ba vitória selesaun portugeza nian.

"Ha’u portadór  missiva Prezidente [timoraoan] Taur Matan Ruak atu hato'o konvite ba señor Prezidente ba vizita Timor-Leste, karik iha tempu", hatete Ramos-Horta ba jornalista sira, hafoin  audiénsia ho  Marcelo Rebelo de Sousa, iha Palácio de Belém.

Antigu xefe Estadu timoroan informa katak  Prezidente portugés " simu ho kontente" konvite ne’e.

"Nia hakarak vizita Timor-Leste, maibé seidauk bele, hanesan  amigu boot liu iha kauza naruk Timor-Leste nian, ba ninia antesessór no governante portugés sira hotu. Ami, Timor-Leste, sente kontente tamba iha amigu ida ho kualidade hanesan ne’e", afirma Ramos-Horta, ne’ebé hatete seidauk hatene karik deslokasaun bele realiza iha tinan ida ne’e.

Maibé Ramos-Horta garante: "Iha resesaun ba professor Marcelo Rebelo de Sousa sei maka’as  ka  pelumenus hanesan ho festeju vitória Portugál, iha [kuarta-feira] ne'e, kontra  País de Gales".

Vitória hosi selesaun futeból  portugeza hetan festeju iha dalan sira Díli nian hosi timoroan rihun resin, liuhosi karavana, ho festa sein presedente iha nasaun.

Ramos-Horta komenta katak  apoiu timoroan nian ba "seleção das quinas" hatudu iha "proximidade emocional".

"Sira bele  basa-liman ba seluk, maibé nafatin basa-liman, ba selesaun portugeza ka kualkér klube portugés ne’ebé  iha liur ", realidade ida ne’ebé verifikadu moos iha Giné-Bisau, maka nia iha ne’ebá hanesan reprezentante espesiál sekretáriu-jerál Nasoin Unidas.

Durante enkontru iha Belém, Ramos-Horta informa ba Marcelo Rebelo de Sousa kona-ba  "evolusaun pozitivu situasaun polítika no ekonómiku" Timor-Leste nian.

"Maski sei iha  dezafiu barak n’ebé maka  Mundu enfrenta, Timor-Leste sei la’o ho di’ak tamba iha fundu ida rasik, iha posibilidade, hosi reseita petróleu no gás, kontinua finansia kresimentu ekonómiku Timor-Leste, ne’ebé aas liu Nasaun CPLP no ida ne’ebé aas liu moos iha  Mundu, maski ita hatene ona katak foin hahú iha zero", nia haktuir no hatutan katak  iha "alterasaun signifikativu" iha nasaun dékada sira ikus  ne’e .

SAPO TL ho Lusa

Publicada por TIMOR AGORA