sábado, 14 de maio de 2016

Fundasaun OGFICE Aloka $40,000 Ba Programa Bolsu Estudu

Diretor Ezekutivu, Osaka Gas Foundation Of Internasional Cultural Exchange (OGFICE), Toru Yoshioka, hateten fundasaun aloka osan $40.000 ba programa bolsu estudu iha tinan 2016 ne’e.

Nia dehan, kada tinan OGFICE fo bolsu estudu ba estudantes nain 20 husi fakuldade Engineering Universidade National Timor –Lorosa’e (UNTL) hodi estuda iha rai laran inklui fo treinamentu ba dosentes iha Japaun.

“Edukasaun importante ba dezenvolvementu nasaun ida nian, e ami kontente tebes tanba bele ajuda joven sira iha Timor –Leste,” nia koalia, iha serimonia entrega sertifikadu ba bolseirus iha salaun auditorio UNTL, Dili.

Depois de tinan ida programa ne’e implementa, nia dehan, sira sei halo avaliasaun ba bolseirus nia rezultado akademiku, e ba sira ne’ebe rezultado ladiak sei hapara no sira ne’ebe diak kontinua.

Alende Timor –Leste, nia dehan, sira mos fo bolsu estudu ba foinsa’e sira iha nasaun hirak ne’e produs gas iha regiaun Sudeste Aziatiku hanesan Indonesia no Malaysia.

Entretantu Reitor UNTL, Francisco Martins, enkoraja bolseiru sira atu estuda maka’as liu tan hodi bele defende nafatin bolsu ida ne’e to’o remata.

“Hau enkoraja imi, tenke estuda durante oras nia laran kada loron, atu fortifika imi nia akademika performance no kualidade akademika,” nia enkoraja.

Nia informa, governu Japaun liu husi OGFICE no JICA apoia UNTL hahu tinan 2001 hodi estabelese fakuldade engineering, siensia no teknologia.

Iha parte seluk, reprezentante bolseirus, Canizia Freitas Santos Pereira, hato’o agradese ba OGFICE ne’ebe supporta ona sira nia estudu, tanba durante ne’e financial sai problema bo’ot ba sira.

“Ami nia kolega barak matenek no iha potensial, maibe atu determina sira nia estudu, presiza tempu naruk no balun tenke husik sira nia estudu, tanba problema osan,” nia dehan.

Nia dehan, osan ne’ebe sira hetan husi OGFICE sei fasilita sira atu sosa sira nia ekipamentus eskola nian hanesan laptop no livrus.

The Dili Weekly

Publicada por TIMOR AGORA

Nenhum comentário:

Postar um comentário