sábado, 7 de maio de 2016

Ministru Edukasaun kontinua iha Governu hodi garante "estabilidade governativa"

Ministru Edukasaun garante horisehik ba Lusa katak nia sei kontinua iha ezekutivu hanesan independente, sees an hosi atividade sira loroloron partidu nian, PD, hodi garante estabilidade governativa to’o eleisaun 2017.

"Ne’e desizaun pesoál no polítika partidu nian, katak ami sei kontinua fó ami-nia kontribuisaun hodi garante estabilidade governativa ne’ebé kria iha 2015, to’o 2017", afirma António da Conceição.

Governante ne’e esplika nune’e nia desizaun no membru Partidu Demokrátiku (PD) na’in lima seluk ne’ebé halo parte iha ezekutivu, hodi sees an hosi atividade partidária sira no nafatin iha Governu hanesan "independente".

Rekorda katak Dionísio Babo, sekretáriu-jerál maiór partidu nian, Kongresu Nasionál Rekonstrusaun Timooan (CNRT) hakerek ba kompañeiru na’in neen iha Governu hodi husu ba sira atu deside sira hakarak hela hanesan independente iha Ezekutivu ka tun hosi funsaun hafoin CNRT hakotu koligasaun ho PD.

Argumentu ne’ebé hanesan mós mak bankada CNRT uza iha semana ne’e iha Parlamentu Nasionál hodi destitui meza parlamentu nian, hasees elementu sira PD nia ne’ebé uluk integra mós iha meza, no hili fali meza foun kompostu de’it ho deputadu sira hosi nia bankada, ho maioria relativa.

Membru Governu na’in neen hosi PD, inklui António da Conceição ne’ebé uluk hanesan membru Konsellu Polítiku Nasionál (CPN), konfirma desizaun liuhosi karta hodi hela hanesan independente.

"Uluk ami partisipa iha Governu hanesan membru bloku koligasaun, maibé horikedas CNRT husu desizaun, ami membru PD nian haruka karta ofisiál hodi konfirma ami-nia pozisaun hanesan independente, iha ami-nia atuasaun iha governu ne’e", nia esplika.

Governante timoroan ne’e afirma katak desizaun ne’e signifika "hadook-an hosi atividade sira loroloron partidu nian" maibé ida ne’e laimpoin "kualkér limite ba direitu atu sai sidadaun timoroan, ho opsaun polítika".

"Buat ne’ebé mportante liu mai ha’u mak lahalo intervensaun polítika partidu nian iha atuasaun sira Governu nian", nia hatete.

António da Conceição hatete katak desizaun ne’e sei la prejudika partidu iha votu 2017 nian, tanba ne’e hanesan desizaun hodi "kontribui ba governasaun no mantein kontinuidade governasaun".

Agora, nia hatete, maski nune’e, "karik partidu ne’ebé hetan votu brak liu hakarak hadook membru PD sira, hatete katak laiha ona bloku, bele mosu konsekuénsia sira seluk inklui jurídika, kona-ba lejitimidade no legalidade governu ne’e nian".

"Natoon ba CNRT atu deside karaik Governu ne’e sei lejitimu ka legál", nia hatete.

Refere katak horikedas nia simu pose iha inísiu 2015 Governu ne’ebé lidera hosi Rui Maria de Araújo forma hosi elementu CNRT barak, elementu na’in neen ne’e hosi PD no sira seluk, inklui xefe Governu rasik, hanesan militante Fretilin nian.

SAPO TL ho Lusa

Publicada por TIMOR AGORA

Nenhum comentário:

Postar um comentário