“La tempu ona ita atu temi liafuan
milisia, oportunista no mau-hu. Hahu iha resistensia armada iha Same husi 1975
too funu remata 1999, hau maka mobiliza kaixa klandestina no elementu frenti
klandestina sira iha Same, hatene no konhese momos Sr. Agostinho Gomes ho nia
familia. Sira ema laran mos no fo vida
tomak ba prosesu luta ida ne’e to’o hetna ukun rasik an,” afirma Komandante Rai Lakan, liu husi
konferensia imprensa iha Dili, Kinta (2/6/2016), hodi rekuza akuzasaun eis Vise
Ministru Obras Publikas iha Governu Tranzisional atual Sekretariu Jeral partidu
Frenti-Mudança, Cesar Vital Moreira,
ne’ebe haruka mesajen ka SMS ba Agostinho nia alin hodi dehan, sira
(Agostinh-red), milisia, mau-hu no traidor.
Iha konferneisa imprensa ne’ebe marka
mos grupu joventude klandestina lubuk ida, inklui eis forsa armadas FALINTIL
balun, Komandante Rai Lakan deklara katak, sira duni maka harii kaixa
klandestina iha Manufahi hodi organiza jovendude, funsionariu sivil no militar
iha tempu okupasaun Indonesia nian iha Same, tanba ne’e, nia hatene momos ema
ne’ebe maka kolabora ho frenti armada no frenti klandestina, inklui hatene
didiak tebes kolaborasaun Agostinho Gomes nia iha altura neba.
Agostinho Gomes, hateten Komandante Rai
Lakan, fo kontribuisaun boot iha prosesu luta mai to’o tinan 1999. Nia halo
sakrifisiu hotu, inklui fo ajudas material, hahan, ropa no nesesidades ba
FALINTIL liu husi estafeta sira atu ajuda suverviviu luta armada nian.
“Hau la nega no hau hatene Sr. Agostinho
nia kontribuisaun ba organizasaun klandestina neebe ami hari iha Same. Sr.
Agostinho laos ema kualker, nia ajuda resistensia armada desde funu hahu iha
rai Same. Hau mak haruka hau nia estafeta
hasoru Sr. Agostinho atu ajuda
funu. Hau rekonese no hau labele nega sira nia esforsu,” afirma Komandante Rai
Lakan.
Nia hateten, iha funu naruk no
sofrementu oi-oin iha ai-laran, Agostinho ho sdira lubuk ida ne’ebe sai
funsionariu sivil no militar iha tempu Indonesia nian, ajuda maka’as tebes
FALINTIL no fvortelese rede klandestina ne’ebe hetan orientasaun direitamente
husi Komandante Em Xefi das FALINTIL, Kay Rala Xanana Gusmão.
“Agostinho laos traidor, nia iha
resistensia armada nia sorin. Iha slogan ida
hanesan nee, Falintil mak ikan, povu maka we.
Ho
nune’e, Sr. Agostinho hola parte no kontribui mos iha wee hodi fo moris mai
ikan maka FALINTIL. Hau lahatene hau nia maluk ida husi Baucau, Cesar Vital
Moreira, luta oinsa mas ne’e ida-idak
nia istoria ne’ebe merese ema hotu respeita,” hateten Komandante Rai Lakan.
Nia husu ba Cesar Moreira atu la hatene
no lakonhese malu karik, diak liu lalika sukit situasaun sira ne’e. tanba lia
fuan milisia ne’e Soeharto lori tihao na ba Indonesia iha 1999 no agora hela
iha Timor ne’e mesak Timor oan deit no Timor ida deit.
“Kuandu imi lahatene malu lalika koalia
ida nee traidor, koalia kona ba projetu, lalika akuza malu ida nee traidor,
tanba iha funu naruk nee ita la konese malu, tanba rejiaun ida-idak hatene
ninia ema. Neebe hau hakarak deklara katak Agostinho laos traidor. Hau konhese
Agostinho tanba hau sempre liga ho nia no husu ajuda ba nia, hau lahatene Sr.
Cesar Moreira nee liga ho Sabica ho sira seluk ka lae, maibe hau hatene
nia seidauk liga ho hau,” afirma
Komandante Rai Lakan.
Nia hatete, iha funu naruk Agostinho fo kontribuisaun ba resistensia
armada hanesan aihan, osan, aimoruk, ropa no sel-seluktan liu husi estafeta.
Sasan sira neebe simu faher hotu ba elementus forsas armada nian iha Rejiaun II
ho Rejiaun III.
“Sasan neebe ami simu husi Sr. Agostinho
ami rejistu hotu. Hau labele nega sasan nebe ami simu iha ailaran, tantu mai husi funsionariu, saude, emprezariu,
sivil, militer no sel-seluktan,” katak Rai Lakan.
Nia deklara tan katak iha tempu ukun an
nee la tempu ona Timor oan sira atu dun malu katak ida nee funu nain no ida nee
lae, ida nee traidor, milisia no oportunista. “Liafuan traidor, oportunista no
milisia nee tempu liu ona, tanba liafuan
sira nee Soeharto lori ona ba Indonesia iha 1999. Se deit labele uza liafuan ida nee. Mauhu ho
milisia nee buat liu tiha ona, agora ita hotu hakarak hadia povu nia moris,”
nia hateten.
Tempo agora nee, tiur Komandante Rai
Lakan, Timor oan hotu buka tuur hamutuk hodi koalia kona ba povu nia kiak no
povu nia moris iha area rural neba. Buat nebe liu ona labele sukit fila
fali atu provoka instabilidade no
destroe unidade nasional.
Nia husu ba Cesar Moreira atu hatudu evidensia no provas hodi aprezenta
iha Tribunal kona-ba Agostinho ne’e
traidor, milisia no oportunista.
No karik Agostinho oho Cesar Moreira nia familia ruma bele lori ba Tribunal.
Iha fatin hanesan Forsa Kompania Unidade
Kaer Moris, Domingos da Silva “Kalohan”
fo sasin katak nia la simu liafuan sira ne’ebe akuza husi Cesar Moreira.
Nia dehan, problema partikular entre emprezariu ou hadau
malu projetu, lalika sukit fali buat neebe liu ona.
“Hau Domingos da Silva alias Kalohan nee
la simu lia fuan milisia nee, karik ida nee mak milisi lori ba tribunal no
hatudu evidensia. Se iha evidensia ruma mak hatudu ami nia maun Agostinho oho
ema, ka oho ema nia fen lori ba tribunal, ami prontu sai testamunha iha
tribunal,” afirma Kalohan.
Iha sorin seluk, Atino Same nudar
estafeta klandenstina fo sasin katak buat ida milisia nee mosu iha tinan 1999,
iha Same grupu klandestina barak halai ba igreja tanba milisia nia hahalok.
“Se karik hau nia maun Agostinho nee
milisia, ohin loron hau la moris no hau la koalia iha fatin ida nee. Hau nia
maun Agostinho nee mak semana-semana vizita ami iha igreja lori fos no sasan ajuda
ami iha igreija,” afirma Kalohan.
Kalohan husu ba publiku, infelsimente ba
Cesar Moreira atu lori Agostinho ba Tribunal, karik iha provas hatudu dehan,
Agostinho traidor no oho ona ema ruma iha teritoriu Timor laran no karik oho
mos Cecar Moreira nia familia balun. mia
Jornal Nacional
Publicada por TIMOR AGORA
NB: Enviem-nos as
notícias das vossas localidades, os vossos eventos, com textos em Word e
imagens em JPG para editorlitoralcentro@gmail.com serão
de imediato divulgadas.
J. Carlos
Nenhum comentário:
Postar um comentário