ATLETAS KEMPO 77 SEI HARAME GMT DILI

Federasaun Shorinji Kempo Timor Leste (FSK-TL), ohin Sesta 25/08/2016 hala’o kampionatu Nasional étapa-V ho objetivu buka fini kualidade hodi prepara ba eventu Internasional.

Tuir dadus ne’ebé Jornalista JNDiário assesu husi administrasaun FSK-TL, Kampionatu Nasional mak sei hala’o no harame eis-jinajiu Dili (Gedung Matahari Terbit) durante loron 26 – 27/08 ne’e, involve atletas mai husi Munisipiu Bobonaro ho nia atleta nain 18, Lautém ho nia atleta 20, Baucau ho nia atleta 19 nomos Dili nudar capital Timor Leste ho nia atleta 20, enkuantu ho nia total atletas hamutuk nain 77.

Iha eis-jinajiu Dili, Kinta (25/08), entrevista Jornalista sira ho presidente komisaun organizadora, Rui Cardoso hateten, tinan-tinan federasaun halo kampionatu Nasional, i tinan 2016 ida ne’e federasaun involve deit atleta junir tuir ida-idak ninia klasse no kategoria.

Presidente komisaun informa liu tan katak, konabá preparasaun enjeralmente kuaze pronto ona,.. i bele dehan 99% tanba ekipa komisaun organizadora halo ninia servisu fulan rua liu ba ne’e, entaun espera que buat sei la’o diak no sussesu tuir tarjetu ne’ebé mehi ona.

Atleta sira ne’e sei compete tuir klase mane ho nia kategoria mak 50 Kg, 55 Kg, 60 Kg no 65 Kg. enkuantu klase feto mos ho nia kategoria mak 54 Kg, 51 Kg no 48 Kg, relata presidente komisaun.

Konaba premiu, manan nain primeiru sei hetan U$ 100.00 ho medalha emas, manan nain segundu sei hetan U$ 75.00 ho medalha perak no manan nain terseiru U$ 50.00, husi manan sira ne’e hotu-hotu sei hetan sertifikadu apresiasaun. Enkuantu presidente komisaun ne’e dehan kampionatu nasional ne’e realize tanba hetan apoiu finanseiru (presidente komisaun la temi sai total orsamentu) husi Governu liu husi Sekretária Estadu ba Juventude no Desportu (SEJD), relata presidente komisaun organizadora.

Iha fatin hanesan, atleta husi Munisipiu Bobonaro Jefrianos Herug hateten, prontu atu compete ho nia adversariu sé deit tanba halo ona preparasaun ne’ebé másimu ona.

“Haree husi preparasaun ne’ebé mak durante hau halo, fiar katak bele ganha ka bele manan hodi okupa primeiru lugar iha eventu kampionatu ne’e.” optimista Nia. Ito

Jornal Nacional

Publicada por TIMOR AGORA