HIAM Health: Loron 1000 Mak Odamatan Ba Futuru Labarik

Organizasaun HIAM Health konsidera loron rihun ida (hahu inan hetan oan iha knotak to’o bebe moris mai tinan rua) hanesan odamatan ba futuru labarik ida nian, tanba ne’e importante tebes ba inan sira atu komprende saida mak presiza han no halo durante loron rihun ida ne’e nia laran.

Diretora organizasaun Hamutuk Ita Ajuda Malu (HIAM) Health, Rosaria Martins da Cruz hateten Timoroan ho idade fulan 0-59 barak sofre malnutrisaun, tanba inan sira la fo atensaun ba aihan ne’ebe nia konsumu, durante bebe iha isin to’o bebe moris.

Nia esplika, fo importansia ba loron rihun ida katak hahu husi inan isin rua tenke konsumu hahan ne’ebe iha balansu no do’ok husi problemas, nune’e bebe moris mai ho saudavel iha fiziku no kakutak.

“Inan sira tenke tau importansia katak loron rihun ida ne’e ita nia oan nia futuru hahu iha ne’eba ona,” nia hateten, iha nia knar fatin Aimutin, Dili.

Nia mos, husu inan sira atu fo aihan local ba labarik sira no labele fo hahan plastiku (SUN) ba labarik sira, tanba bele prejudika fali ba labarik nia saude.

Bebe ne’ebe la hetan atensaun husi inan durante loron rihun ida nia laran, nia dehan bebe sei moris mai ho kondisaun todan menus, fasil hetan moras no bele sofre malnutrisaun.

Nia parte duvida ho Ministerio Saude nian iha politika nutrisaun nian atu fo importansia ba loron rihun ida, maibe realidade la halo kampanha ba komunidade kona ba kestaun ne’e.

Iha parte seluk responsavel Klinika Bairo-Pite (KBP), doutro Daniel Murphy hateten kada loron labarik nain 10 ba leten mak baixa iha klinika, tanba sofre malnutrisaun grave.

“Hau haree inan barak fo susu oan oituan deit, depois fo sasoro tanan la kahur buat ida ba labarik, ne’e la’os halo labarik sai diak maibe labarik ne’e krekas no bele mate,” nia hateten. 

Labarik sofre malnutrisaun bele salva sira nia moris, maibe nia hateten sira nia kakutak labele dezenvolve ona ho diak, tanba malnutrisaun afeita direita ba kakutak.

Tanba ne’e, nia husu ba jornalistas atu kontribui halo sosializasaun ba komunidade liu husi publikasaun artikle iha sira nia media ida-idak kona ba aihan balansu ne’ebe fo nutrisaun ba labarik sira.

The Dili Weekly

Publicada por TIMOR AGORA