Família atus resin iha munisípiu timoroan hitu simu ona apoiu emerjénsia hosi Governu hodi harii fali uma sira ne'ebé hetan estraga tanba udan no anin maka'as iha inísiu fulan ne'e, ne'ebé halo ema na'in lima mate no ema barak kanek, fó sai hosi fonte ofisial iha loron-kinta ne'e.
Agostinho Cosme Belo, diretór nasional ba Jestaun Risku Dezastre sira nian hosi Ministéiu Solidariedade Sosial explika ona ba Lusa katak sei determina hela númeru final hosi família sira ne'ebé afetadu no destaka ona ekipa oioin emerjénsia nian hodi apoia populasaun sira.
"Informasaun preliminar sira hatudu katak besik família 800 maka afetadu. Ami sei verifika hela", nia hatete.
Belo refere ona katak família atus resin simu tiha ona apoiu sira hanesan hahán, sasán balun no apoiu finanseiru hosi ezekutivu hodi ajuda hasoru ho situasaun emerjénsia no hodi nune'e bele hahú harii sira nia uma.
"Apoiu total sei fahe bainhira ami verifika ona informasaun tomak", nia explika.
Iha Ermera, pelumenus uma hamutuk 54 hetan estraga, iha Manufahi uma hamutuk 158 hetan estraga no uma oioin hetan estraga iha Ainaro, Aileu ho Lautem.
Iha rejiaun Atsabe, Ermera, Ministériu Solidariedade Sosial, liuhosi Sentru Solidariedade Sosial munisípiu nian (CSSME), entrega ona apoiu emerjénsia ba família hamutuk 155, ho produtu hahán sira nian, avalia hela nesesidade sira ba sasán konstrusaun nian hodi rekupera uma sira ne'ebé hetan estraga.
Apoiu hanesan fó mós ba família sira iha Díli no mós iha munisípiu sira iha Aileu, Ainaro, Baucau, Same ho Lautem, hanesan resposta uluk ba tempu ladi'ak ne'ebé akontese iha zona sira ne'e iha inísiu Fevereiru.
Iha kazu Díli, apoiu entrega ona, simbolikamente, hos visi-ministru Solidariedade Sosial nian, Miguel Marques Gonçalves "Manetelu", ne'ebé entrega ona apoiu hahán no sasán ba kontrusaun báziku nian.
Governu explika ona katak, iha kazu ne'e, família ida-idak sei simu kontribuisaun finanseiru ida ho dolar 368, ne'ebé dolar 150 sei selu serbisu hodi harii uma no sira seluk hodi sosa sasán hodi halo konstrusaun.
Iha loron 10 liubá, Ministériu Interior no Solidariedade Sosial halo ona balansu provizóriu dahuluk hosi impaktu tempu ladi'ak ne'ebé akontese iha fatin oioin iha nasaun no t'o loron 08 Fevereiru halo ona ema na'in lima mate (na'in haat iha Baucau no na'in ida iha Ermera) no na'in lima kanek (na'in tolu iha Baucau no na'in rua iha Ermera).
Domingos Pinto, diretor-jeral hosi Serbisu Operasional sira, explika ona katak simu relatu sira hosi insidente sira ne'ebé mosu tanba tempu ne'ebé ladi'ak hosi kuaze nasaun tomak, ne'ebé mosu tanba udan-boot no anin maka'as ne'ebé halo ai monu, rai-monu no uma atus resin hetan estraga maka'as.
SAPO TL ho Lusa
Nenhum comentário:
Postar um comentário