Prezidente husu rezolusaun ba frontera maritime iha diskursu Loron Independensia

Prezidente da Republika de Timor-Leste, Taur Matan Ruak iha nia diskursu iha komemorasaun loron independensia (20 Maiu 2106) husu governu Australia atu hakotu tiha disputa markasaun fronteira maritima ho Timor-Leste.

Maske rekonese amizade nasaun rua ne'e nian, Ruak hateten rezolusaun ba asuntu ne importante tebes hodi hametin liu tan relasaun bilateral iha futuru.

"Timoroan no ema Australianu kontinua halo interkambiu ida ne’ebe intensivu iha nivel hotu-hotu," Prezidente Ruak haktuir iha Gleno, Ermera, iha loron 20 de Maio.

"Ita labele husik adia tan problema fronteira tasi Timor no labele husik mos kestaun ida nee prejuidi fali ba relasaun ne’ebe ita nia povu sira hakiak ona hahu husi funu mundial daruak no iha momentu importante sira seluk iha tinan 70 ikus nee."

Nia dehan, estabelesementu fronteira maritima permanente ba riku soin Tasi Timor nian reprezenta pasu importante ida hodi hametin soberania Timor-Leste nian hanesan nasaun independente no suporta husi lei no komunidade internasional.

"Hau husu ba governu Australia atu buka meius hodi hatan ba Timor-Leste nia pedidu ne’ebe natural no lejitimu hodi loke negosiasaun kona ba tau baliza permanente ba fronteira tasi nian entre vizinu rua ne’ebe iha hanoin diak ba malu," nia sujere.

Prezidente mos agradese ba povu Australianu sira ne’ebe mak suporta ona kampanha Timor-Leste no husu ba governu Australia atu rezolve asuntu ne'e ho lais.

"Timoroan hein atu haree governu Australia hodi foti asaun ne’ebe mak pozitivu," nia dehan.

Timor-Leste hatene katak akordu ne’ebe mak asina tiha ona ho Australia iha tinan 2002 no 2006 la justu no lakon osan milaun barak iha rendimentu mina no gas iha akordu ne'e.

Iha fulan Marsu, mais umenuz ema 10.000 hola parte iha asaun protesta durante loron rua iha Embaixada Australia nia oin, Dili ne'ebe husu ba Australia atu halo negosiasaun ida ne'ebe justu hodi harii fronteira maritima permanente iha Tasi Timor.

Iha fulan kotuk Timor-Leste lori Australia ba iha Nasoens Unidas hodi inisia konsiliasaun formal husi painel peritu ne’ebe independente.

Eis Primeira Dama Kristy Sword Gusmao, ne’ebe partisipa iha serimonia ofisial iha Gleno hetan medalla kondekorasaun husi Timor-Leste ne’ebe simu iha tinan kotuk, nia espera katak governu Australia bele muda sira nia hanoin.

"Hau hanoin asuntu fronteira maritima hanesan asuntu ida ne’ebe mak ita labele husik hela, ida ne'e importante tebes ba futuru no seguransa ekonomiku Timor-Leste nian," nia haktuir ba The Dili Weekly.

"Hau privadu, hein katak sei iha mudansa politika no prontu atu tuur hamutuk no halo negosiasaun ne’ebe mak justu."

Iha selebrasaun ofisial tinan ne'e, ema Australianu nain 7 no organizasaun sira hetan kondekorasaun ba rekonesimentu nia kontribuisaun ba Timor-Leste.

The Dili Weekly

Publicada por TIMOR AGORA

_______

NB: Enviem-nos as notícias das vossas localidades, os vossos eventos, com textos em Word e imagens em JPG para editorlitoralcentro@gmail.com serão de imediato divulgadas.

J. Carlos