SE Portugal Visita Sentru Saude Veira Cruz

 Sekretaria Estado Sidadania no Igualidade Jeneru Portugal, Catarina Marcelino hala’o vizita especial ba Sentru Saude Veira Cruz (SSVC) hodi haree direita atendementu planeamentu familiar ba inan feto sira iha Timor -Leste.

Hafoin observa direitamente, nia hateten implementasaun programa PF iha Timor –Leste hatudu progresu positive tebes, tanba iha kooperasaun servisu ne’ebe diak entre governu Timor –Leste ho agensia internasional sira hodi estabelese sistema atendimentu ne’ebe diak.

“Hau haree agora iha positive bo’ot, uluk iha preokupasoens barak kona ba material kontrasepsaun, maibe ho apoia agensia internasional governu kria ona sistema ida ne’ebe diak ba saude maternu infantil no planeamentu familiar,” nia hateten hafoin halo visita ba iha sentru saude Veira Cruz, Dili.

 

Nia hatutan, planeamentu familiar importante tebes atu halo espasu ba partus hodi premite feto sira bele rekopera sira nia saude no bebe.

Entretantu Diretora Sentru Saude Veira Cruz, Dulce Tilman, orgulho tanba Ministerio Saude no UNFPA hili sentru ne’e sai fatin vizita Sekretario Estado Portugal nian hodi hares besik servisu atendementu saude familia nian.

Nia dehan, atendementu saude familia sira halo lor-loron (Segunda to’o Sesta-feira) tanba numeru kliente aumenta ba beibeik.

“Tinan ida ami fo atendementu ba ema nain 600, maioria sira hili metodu modernu (Injection, implant, IUD, no Pil),” nia informa.

Kona ba material kontrasepsaun no medikamentus, nia dehan, laiha problema tanba hetan apoia husi UNFPA.

Iha parte seluk reprezentante Agensia Nasoens Unidas ba Fundus Populasaun (UNFPA) iha Timor –Leste, John M. Pile, hateten Portugal hanesan doador ba programa global UNFPA nian hodi apoiu material kontrasepsaun nian.

Nia dehan, hahu tinan 1999 UNFPA apoia material kontrasepsaun 100% ba governu Timor –Leste hodi asegura ema hotu bele asesu ba atendementu saude reprodutivu no saude familia.

“UNFPA kada tinan aloka osan besik $1 miliaun hodi sosa material ne’ebe presiza no apoia asistensia teknika hanesan dezenvolve materia treinamentu no fo formasaun ba pesoal sira,” nia hateten.

Kona ba resultado implementasaun programa, nia dehan, Timor –Leste sei hatene nia resultado liu husi demographic and health survey ne’ebe tuir planu sei hala’o tinan ne’e (2016).

Antes halo vizita ba iha Sentru Saude Veira Cruz, Sekretario Estado Sidadania no Igualidade Portugal, hala’o uluk vizita ba iha Servisu Autonomo Medikamentus e Ekipamentus Saude (SAMES) hodi haree kondisaun armagen no rona sistema distribuisaun material kontrasepsaun no medikamentus ba iha fasilidade saude sira.

The Dili Weekly

Publicada por TIMOR AGORA

______

NB: Enviem-nos as notícias das vossas localidades, os vossos eventos, com textos em Word e imagens em JPG para editorlitoralcentro@gmail.com serão de imediato divulgadas.

J. Carlos