DÍLI, (ANTIL)— II Vise-ministru Edikasaun, Abel da Costa Ximenes fó ezemplu katak Singapura, Koreia, Inglatera ho Alemaña sai nasaun ho ekonómia forte no industriál tanba fó atensaun liu ba iha edukasaun, iha área Ensinu Tékniku Vokasionál (ETV).
Vice-ministro koalia ba profisionál komunikasaun sosiál sira iha Becora, Díli, Segunda (27/2) katak ema sira ne’ebé tama iha área ensinu tékniku vokasionál alende sira hetan koñesimentu teória, hetan mós oportunidade atu aprende hodi tama iha merkadu traballu.
“Tanba haree iha área informátika, automotif, eletrisidade no área seluk tan halo estudante sira hetan teória, prátika mós la’o,” tenik Vice-ministru edukasau.
Ho nune’e, tuir Abel da Costa Ximenes, durante tinan tolu estudante sira bele preparadu tama merkadu serbisu.
Diretór Ensinu Tékniku Vokasionál, Becora, Francisco Guterres dehan ho apoiu laboratóriu no formasaun ba profesór sira husi eskola ne’e iha Koreia do Sul no apoiu voluntáriu na’in ne’en ne’ebé governu koreanu liuhusi KOICA (Korean International Cooperation Agêncy) bele prepara estudante sira hodi kontribui ba dezenvolvimentu Timor-Leste.
“Prepara duni estudante sira ne’ebé mak atu iha koñesimentu no kualidade ba futuru tan alende teória, estudante sira mós sei prátika,” garante diretór ne’e.
Iha tinan létivu 2007, estudante sira ne’ebé sei sai benefisiáriu ba apoiu governu Koreia do Sul liuhusi KOICA hamutuk na’in 990 ne’ebé mai husi departamentu ne’en ne’ebé eziste iha ETV-Becora, Díli hanesan departamentu elektrónika, elektrisidade, konstrusaun sívil, mekániku automóvel no mekániku produsaun nomós informatika. (Jornalista: Rafy Belo/Editor : Alberto Alves)
Foto: Estudante ETV Becora sira bainhira tuir hela prosesu aprendizajen. Foto espesiál.
Publicada por Timor Agora
Nenhum comentário:
Postar um comentário