domingo, 1 de maio de 2016

KOMISAUN ARBITRAZEN LA TOLERA JOGADOR INDISIPLINA


Komisaun arbitrajen Liga Futebol Amadora (LFA) sei la tolera jogador sira hatudu indisiplina bainhira jogu iha kampu.

Komisaun arbitrazen haruka ona karta ba komisaun disiplinar no étika LFA (Liga Futebol Amadora) Timor Leste, hodi fó sansaun ba jogador nain rua (2) husi klubu futebol Carsae FC Chiquito do Carmo ho João B. Gama ne’ebé hatudu indisiplina hodi tuku arbitu Pedro de Carvalho nia matan laran iha jogu jornada da-6 entre Carsae FC ho AD.SLB ne’ebé mak hala’o iha Estadiun Munisipal Dili, Sabadu (23/04) foin lalais ne’e.

Relasiona ho karta refere, komisaun arbitrazen sublinñ katak arbitu sei la tolera kualker jogador ne’ebé mak hatudu indisiplina hodi halo agregasaun fiziku ba arbitu no kualker joagador adversariu ka nia maluk jogador rasik bainhira hala’o jogu iha kampu laran, tanba tuir regras jogu númeru 12 bandu jogador sira labele hatudu indisiplina.

“kona ba karta ne’ebé mak ami halo, ami hakerek katak arbitu sei la tolera jogador ne’ebé mak kontra regras númeru 12 koalia kona ba jogador ne’ebé mak halo agregasaun fíziku iha kampu laran, ho ida ne’e ami relata tan iha karta ne’e kona ba jogador ne’ebé halo agregasaun fíziku iha kampu laran nia sei simu  konsekuensia tenke hetan kartaun mean,” informa Direktor Arbitrazen LFA, Vital Bere Saldanha ba JN-Diário iha Estadium Munisipal Dili, Segunda (25/04).

Ne’e regras númeru 12 tuir lei jogus nian hatete kedas, jogador ne’ebé mak halo agresaun fíziku ba kualker jogador liuliu ba iha árbitrazen, ida ne’e mak komisaun arbitrazen foti sansaun ne’e tuir regulamentu númeru 12 nian, tenik Vital.

Tuir regulamentu refere dehan katak jogador ne’ebé mak hetan kartaun mean direita, nia sei la partisipa iha jogu rua tutuir malu, maibe desizaun ikus fila fali ba komisaun disiplina e étika LFA nian, tanba LFA mós iha lei interna no cabe tan ho regulamentu númeru 12, LFA sei desizaun tuir regras jerais nomós regras interna LFA nian, afirma Vital Bere.

Tanba ne’e Vital husu ba komisaun disiplinar e étika LFA nian tenke fortifika liu tan ho regras hirak ne’ebé mensiona iha leten hodi foti desizaun fó sansaun ba jogador nain rua husi Carsae FC (Chiquito do Carmo ho João B. Gama).

Iha fatin hanesan, Prezidenti komisaun disiplinar e étika LFA, Octavio da Conçeição hateten, relasiona ho infrasaun ne’ebé komete husi jogador Carsae FC nian nain rua (Chiquito do Carmo ho João B. Gama), konsellu disiplinar no étika simu ona relatoriu husi director da kompetisaun nomós direksaun arbitrazen ne’ebé lidera jogu ne’e. Hare katak iha duni infrasoens fízikamente ne’ebé rezulta arbitu ne’ebé lidera jogu (Pedro de Carvalho) hetan kondisaun saúde ne’ebé grave.

“Tanba ne’e komisaun disiplina no étika depois de halo análiza ba rekursu ne’ebé hato’o liu husi relatoriu director kompetisaun no ekipa arbitrajen nian, ami diside ona hodi hatun kedas karta desizaun hodi foti desizaun rua, primeiru hatun desizaun koima (multa-red) ba Carsae FC hanesan klubu ne’ebé previnenti husi LFA ninian ho valor montante ne’ebé tuir kódigu konduta LFA nian iha ona, segundu desizaun suspensaun de jogu ba jogador nain rua, hateten Octavio.

Chiquito do Carmo komisaun konsellu disiplinar deside katak agregasaun fíziku ne’ebé mak nia (Chiquito-red) halo hasoru arbitrazen ne’ebé lidera jogu ne’e ami haree (komisaun disiplinar) katak grave tebes tanba ne’e ami suspende  nia ba  jogu tinan rua tutuir malu labele joga, no labele joga iha aktividade kompetisaun LFA nomós ba aktividade jogu ofisial sira ne’ebé mak organiza husi LFA husi époka 2015-2017. Sansaun segundu fó ba jogador João B. Gama komisaun konsellu disiplina e étika deside hodi fó suspensaun ba nia durante tinan 3 tutuir malu, komesa husi époka 2015-2018, nomós sei la partisipa iha eventu ofisial jogus kompetisaun bola nian ne’ebé organiza husi LFA, afirma Octavio.

Prezidenti komisaun disiplinar e étika LFA ne’e esplika katak, jogador João B. Gama hetan suspensaun todan uitoan, tanba konsellu disiplinar bazeia mos ba infrasaun balu ne’ebé mak João komete antes ne’e iha tinan 2012 iha jogu ida iha Munisipiu Baucau ne’ebé Federasaun Futebol Timor Leste (FFTL) fó ona sansaun ba nia durante tinan rua komesa husi 2012-2014, relata Octavio.

“Tan ne’e ami hanoin katak jogador refere, komete infrasaun hanesan ne’e bebeik ona, entaun tenke fó sansaun ba nia todan uitoan to’o tinan 3. akresenta Octavio da Conçeição. Ito

Jornal Nacional

Publicada por TIMOR AGORA

Nenhum comentário:

Postar um comentário