INACIO KONSIDERA NAKROMA INDOZU

DILI - Vise Ministru Obras Públika Transporte no Komunikasaun (MOPTK), Inácio Moreira husu ba deputadu sira iha uma Fukun Parlamentu Nasionál (PN) atu labele jeneraliza ba manutensaun ró nakroma, tenke komprende katak ró Nakroma idade komesa katuas ba bei-beik.

“Hakarak informa de’it ba ita bo’ot sira (jornalista) katak, ita nia ró Nakroma nia idade la’o ba tinan sia (9), hanesan ema karik ró ne’e komesa katuas ba dau-daun ona, ne’ebé ita hakfodak buat ruma komesa a’at ita komesa jeneraliza tun sa’e ba manutensaun, ne’e la’ós  hanesan ne’e,” haktuir Inácio ba jornalista iha Palásiu governu, Tersa, (09/08).

Tuir Inácio, problema ró nakroma ne’e kestaun téknika, tanba ne’e husu atu ema hotu tenke komprende, hanesan vise Ministru transporte no komunikasaun toma responsabilidade.

“Manutensaun ba ró Nakroma ami halo lor-loron, kona-ba kestoês téknikas sira entes, ne’e ha’u hatene, tanba buat ida manutensaun ba piston no segimentus sira dehan tinan 2 tenke troka, mas to’o agora seidauk troka, se maka atu halo esplikasaun, ha’u foin maka mai tinan ida ha’u maka atu halo esplikasaun,”hatete Inacio.

Nia parte komprende deputadu sira iha PN nia lamentasoes, maibé MOPTK sei halo esplikasaun téknika ida atu ema hotu bele komprende.

Hanesan responsavel ba transporte nia parte lakohi iha buat ruma atu akotense iha trasnporte maritima, atu nune’e populasaun sira atu la’o tenke la’o.

“Ró atu lao lalais ka lao kleur ne’e buat normal ida, iha balu hakarak ohin loron ne’e atu ba buat hotu tenke iha, labele hanesan ne’e, buat hotu tenke trata tuir normas ne’ebé maka iha,”haktuir  inacio.

Tan ne’e dala ida tan, nia husu ba parte hotu liu-liu membru parlamentu sira labele politiza, buat ida importante maka hanesan ema ne’ebé ukun tenke ho responsabilidade, labele hanesan ingnora hela servisu lor-loron ne’ebé maka tenke halo.

“Ita to’o agora seidauk fo kontratu ba ema ida atu halo manutensaun, mas kuandu uluk ha’u sei deputadu haree vise ministru ida uluk ne’e fo sasan sira ne’e ba mai de’it, mas agora labele, ne’ebé prosesu ba osan estadu nian tenke liu hosi prosesu aprovizionamentu,”hatete Inácio.

Entertantu antes ne’e, Kapitaun Ró Nakroma entrega tiha ona dokumentus lubuk ida ba Komisaun E Parlamentu Nasionál kona-ba deskonfia manobra balun ne’ebé akontese iha prosesu manutensaun ró nian.

Maske ró kontinua halo hela operasaun ba-mai Dili, Oe-Cusse no Atauro, maibé kapitaun sira preokupa ho kondisaun ró ne’e tanba manutensaun ne’ebé tékniku sira halo la tuir rekomendasaun ne’ebé sira hato’o bazeia ba sira nia kontrolu ba ró nia kondisaun.

Hafoin simu tiha dokumentus ne’ebé kapitadu sira entrega iha ró laran, Vise Prezidente Komisaun E trata ba assuntu Infra-estruturas, Transportes no Komunikasaun, Manuel Castro afirma, sei halo investigasaun.

Castro hatete, nia parte sei bolu governu liuliu Ministériu Obras Públikas, Transportes no Komunikasaun (MOPTK), atu ba hatan iha Parlamentu Nasionál tanba informasaun ne’ebé sira simu ne’e sériu tebes.

“Durante ne’e ami aprova osan boboot para ba halo manutensaun maibé realidade, ami halo observasaun jerál  ba kondisaun Ró Nakroma nian, detekta aparelu ró nian kuaze a’at hotu kedas,”lamenta Deputadu Castro ba Jornalista sira iha ró laran atu halo fiskalizasaun ba estrada iha Atauro, Sábadu  (06/08).

Castro haktuir, durante ne’e kuandu sira husu ministériu  sempre dehan kondisaun ró nian di’ak hela, maibé bainhira hasoru malu ho kapitaun dehan kondisaun ró oras ne’e grave tebes.

“Kapitaun ró ne’e haktuir nia triste tebes kondisaun ró grave iha nia responsabilidade  tanba, aparelu a’at hanesanHand mic VNF Radio, Ekipment Radio, Perhatian Radar, Navtex Receiver,kadeira ba kapitaun nian no mós televizaun iha VIP nia fatin,” Castro haktuir.

Nune’e nia dehan, hala’o nia servisu ho ema sira servisu ne’e nia analiza de’it ona tanba ekipamentu kuaze a’at pior liu maka oli filtru de’it mós atu troka laiha nune’e mós mesin ka motor ró ne’e nia kondisaun di’ak ne’e 80% no motor rezerva iha 60% de’it, ne’ebé motor oras ne’e todan ona tanba ne’e sira dehan sei halai neneik hodi aguenta hodi hein ninia manutensaun.

“Kapitaun haktuir tuir lolo’os (ró) halai bele to’o númeru 12 maibé labele tanba atu halai to’o 10 de’it mós labele kuandu obriga niamesinmanas bele a’at ona. Tanba ne’e sira tenke kuidadu halai to’o iha velusidade númeru 6 ate 8 de’it,”Castro haktuir hafoin rona informasaun hosi kapitaun Ró Nakroman.

“Ami sei ejije governu liuliu ministériu, atu nune’e bolu ema ne’ebé kaer manutensaun ne’e hodi investiga tanba saida maka la halo manutensaun no osan ne’ebé durante ne’e aprova ba iha ne’ebé?,”Castro afirma.(gus)

Timor Post

Publicada por TIMOR AGORA