Asosiasaun Feto Laiha Escritorio Permanente

Prezidente Asosiasaun Feto Munisipio Baucau, Regina de Sousa, hateten sira laiha escritorio (fatin) permanente ida hodi hala’o servisu asosiasaun nian iha baze.

Durante ne’e, nia dehan, sira uza deit espasu ida iha edifisio postu administrativu Baucau Vila nian hodi hala’o servisu, tanba nia rasik hanesan adminsitradora postu maibe agora kargu ida ne’e laiha ona no tenke sai.

“Agora dadaun ami nia sasan asosiasaun nian rai hela iha organizasaun feto CFHD nian fatin, tanba ami laiha fatin,”nia hateten, iha salaun Tower Fatuhada, Dili.

Nia hatutan, asosiasaun presiza mahon atu halibur feto maluk sira halo diskusaun no trasa planu hodi haforsa, enkoraja feto maluk sira seluk involve aan ativamente iha prosesu dezenvolvementu.

Depois de estabelese estruturas asosiasaun nian iha tinan 2015, nia hateten, sira servisu hamutuk ho organizasaun feto iha politika Caucus no Patria, fo ona formasaun ba feto potensial sira, prepara sira hodi kompete iha eleisaun tuir mai.

Iha parte seluk, Prezidente Asosiasaun Feto munisipio Manatuto, Clara de Carvalho Ximenes, hateten sira hala’o servisus asosiasaun nian iha uma rasik, tanba seidauk iha escritoriu permanente.

“Hau uza hau nia uma rasik hodi hala’o servisu asosiasaun nian,” nia hateten.

Kona ba tempu servisu, nia dehan, hanesan funsionario publiku iha orario servisus hahu husi 8:30 to’o 5:30 lokraik, entaun nia uza oras balun no tempu livre hanesan iha loron Sabadu no Domingo hodi hala’o servisu asosiasaun nian.

Nia hatutan, desde estabelese sira fo ona formasaun ba feto potensial sira kona ba lideransa no seluk tan, maibe presiza nafatin entidades hotu nia apoiu hodi dudu servisu asosiasaun nia ba oin no atinji duni sosiedade ne’ebe igual.

The Dili Weekly

Publicada por TIMOR AGORA