NÚMERU PASIENTE HIV/SIDA ÁS IHA DILI

Númeru Pasiente HIV/SIDA Ás Iha Díli Impaktu Ransu Livre, Seksu Livre ba Transmisaun HIV, Isin Rua Sedu, Soe Oan & Para Eskola

 

Seminar Ne’e Hala’o Iha Escola Secundária Católica São José Balide-Díli

Díli - Sekretariu Ezekutivu Komisaun Nasional Kombate HIV/SIDA Timor-Leste Daniel Marçal informa númeru pasiente 570 ne’ebé afeita ba moras HIV/SIDA maioria iha Munisipiu Díli, Bobonaro, Suai, Baucau, no Ermera.

“Tuir dadus ne’ebé iha hatudu katak, númeru pasiente HIV/SIDA ne’ebé ás primeiru maka Díli, segundu Bobonaro, terseiru Baucau no kuatru Ermera, “informa Daniel, ba Jornalista sira iha Escola Secundária Católica São José Operário Balide, Segunda (30/05/2016).

Daniel haktuir, maske nune’e, maibé ba dadaun ne’e iha ema barak maka iha ona konsensia hodi ba halo testu raan, no ema barak maka agora la tauk ona atu ba koko raan, tanba relasiona ho aktividade sosializasaun ne’ebé mak durante ne’e halao husi Governu no Komisaun Nasional Kombate HIV/SIDA.

Nia dehan, husi númeru 570 ne’e barak liu joven sira ho idade 25 to’o 30 no kazu segundu maka idade 15 to’o 25 ne’e maka maka’as liu tanba moras ne’e barak liu daet husi relasaun seksual, ne’e signigika ameasa bo’ot ba nasaun ne’e.

Tanba tuir nia, ba da-daun ne’e, populasaun barak mak laiha koñesimentu no la rona maibé komisaun kontinua halo servisu maka’as liu husi media atu nune’e komunidade sira bele hatene.

“Inan aman tenke fó atensaun maka’as ba oan sira kuandu sira maka la fó atensaun ba oan sira, oan sira bele sai a’at hotu tanba joven uluk la hanesan joven ida agora, tanba uluk joven barak maka ladun hatene kona-bá internet no kaer telefone diak no mós Facebook tanba laiha, i agora ne’e buat hotu livre no joven barak uza dereitu ba modern i dala barak joven sira hare’e filmazen at ne’e husi média sosiál tanba ema balun hatama buat iha ne’ebá, tanba ne’e mak inan aman tenke halo kontrolu maka’as ba oan sira,” Tenik Daniel. (van)

Timor Post, Loron Tersa, 31 Maiu 2016 - Fotografia: Jornál Timor Post, Edisaun Loron Tersa, 31 Maiu 2016, no Facebook CNCS-TL

Publicada por TIMOR AGORA

NB: Enviem-nos as notícias das vossas localidades, os vossos eventos, com textos em Word e imagens em JPG para editorlitoralcentro@gmail.com serão de imediato divulgadas.

J. Carlos