quinta-feira, 4 de agosto de 2016

FOLIN MINA RAI TUUN MAKA’AS, TIA DIVERSIFIKA BA ÁREA TURISMU

Koordenador Triângulo Kresimentu Ekonómia Trilateral, Timor Leste, Indonesia no Australia (TIA), João Goncalves informa katak, agora dada’uk reprezentante husi nasaun tolu ne’ebé servisu iha misaun ida ne’e, buka atu diversifika áreas turismu no seluk tan, tanba folin minarai iha merkadu internasionál tuun maka’as.

“Ita agora hatene katak, presu minarai tuun maka’as, ita presiza diversifika ita nia setores, ne’ebé ami mós buka hanesan fó kontribuisaun ruma, para halo diversifikasaun ba setores seluk, tanba ita nia Governu agora preokupa tebes, ho dezenvolvimentu setor seluk,” informa João Goncalves ba jornalista sira iha Palácio Prezidénsia Aitarak Laran Dili, Tersa (02/08), hafoin hasoru malu ho PR Taur Matan Ruak.

João Goncalves hatutan katak, iha enkontru ne’ebé mak atu hala’o iha Kupang ne’e, sira sei foti kestaun kona-ba turismu, no sei iha peritus ida husi Australia mak sei halo aprezentasaun kona-ba área ida ne’e.

“Ami mai iha Prezidenti Repúblika, hodi hato’o informasaun kona-ba progresu servisu ne’ebé ami hala’o iha ami nia unidade misaun ba dezenvolvimentu ekonómiku sub-rejionál integradu, Timor Leste, Indonesia ho Australia,” informa João Gonçalves.

Nia hatutan, sira halo tiha ona últimu enkontru trilateral ne’ebé hala’o iha Dili, ho partisipasaun delegasaun nasaun tolu ne’e nian. Tanba ne’e mak sira hasoru malu ho PR Taur Matan Ruak hodi informa kona-ba rezultadu enkontru ne’e.

“Ami mós fó koñesementu ba Prezidenti Repúblika katak, iha loron 10/8 agora, iha fali enkontru seluk ida iha Kupang, ho delegasaun rai tolu ne’e nian, karik Prezidenti iha mós asuntu ruma, ne’ebé hakarak ami mós lori ba atu ko’alia iha ne’eba, ami prontu para aprezenta asuntu Prezidenti nian ne’e,” katak João Gonçalves.

Nia dehan, iha ona progresu lubuk ida ne’ebé mak sira hetan ona iha sira nia servisu durante ne’e.

“Ami identifika tiha ona áreas prioridades hitu (7), áreas hirak ne’e, ami atu estabelese sub grupus para sira konsentra sira nia atensaun iha áreas hirak ne’e,” katak nia.

João Gonçalves dehan, desde sira hahú sira nia misaun, buat balun ne’ebé mak sira konsege tiha ona mak, levantamentu destrisoens ba traballadores Timor-oan sira ne’ebé mak atu ba servisu iha Australia.

Nia esklarese, sira sempre levanta asuntu ida ne’e iha enkontru bilateral sira, no ikus mai, Governu Australia autoriza para traballador Timor-oan sira bele tama iha Australia laiha destrisoens hanesan uluk.

“Ida tan mak tradisia fronteira hanesan vistus iha fronteira terrestres, ida ne’e mós desde uluk ami sempre insisti. Ami bolu hotu autoridades no reguladores ita nian sira hotu ne’ebé mak halo leis, hamutuk para ita buka ko’alia no identifika obstaklu saida mak ita hetan durante tradisia fronteira no movimentu sira ne’e hotu, hodi ita buka solusaun, para depois Governu rai tolu ne’e, bele halo lei ruma para ita bele fasilita ema halo movimentu produtus iha sub rejiaun ne’e nia laran,” dehan João Gonçalves.cos

Jornal Nacional

Publicada por TIMOR AGORA

Nenhum comentário:

Postar um comentário