KUALIDADE ENSINU…?!

Jornal Nacional, editorial

 

Timor Leste restaura independensia foin tinan 14 nia laran maibe desenvolvimentu infra-estruktura iha area edukasaun lalais liu, tamba ohin loron nee iha ona Universidade hat, UNTL, UNDIL, UNPAZ, UNITAL no institutu superior lubuk, eskola baziku to’o sekundaria kuaze iha teritoriu tomak.

Konta matematika karik bele dehan numeru universidade no institutu sira nee suficiente ona atu bele responde ba nesesidade ema nebe hakarak kontinua ninia estudu ba nivel aas liu tan maibe importante mak kualidade ensinu iha ensinu superior sira nee.

Universidade no institutu sira nee kada tinan produz finalista ‘injeneirus’ rihun ba rihun maibe estadu kontinua preokupa ba kualidade finalista sira husi universidade sira iha rai laran nian.

Universidade sira nee la produz rekursu humanus nebe kualifikadu mak kontribui ba aumenta problema desempregu iha rai laran. As vez parometru ema matenek mai husi universidade nee mak oinsa bele hetan servisu iha funsaun publiku, inan aman sira kontenti se oan sira sai husi universidade ba buka servisu no liu sai funsionariu publiku.

Tuir lolos hanoin ida nee sala, ema matenek laos buka servisu ka husu atu ema seluk fo servisu maibe filosofia ema matenek nee oinsa kria kampo servisu ba an rasik no mos kria servisu ba ema seluk, loke kampo servisu.

Proekupasaun estadu nian pretenente tamba universidade rasik iha hela prosesu akreditasaun, univesridade sira nee priense duni rekejitus hanesan universidade, liu-liu dosentes, Mestradu no doutoramentu suficiente ka lae? laboratoriu no bilioteka iha ka lae?

“Kualidade edukasaun ita  labele defini sem uma forma rapida, ita presiza haree husi aspetu oi-oin, do uma maneira ita presiza halo esforsu maka’as liu tan para melhora liu tan Qualidade de Ensino hahú husi  Ensino Basico ba Secundario  to’o mos Ensino Superior,” PM Rui, Jornal Nacional Diario edisaun 02/08/2016.

Laiha duvida senhor Primeiru Ministru, labele difini kualidade edukasaun nee lalais tebes, presiza tempo tamba edukasaun nee hanesan korente matan ida, formasaun ensinu basiku importante liu duke formasaun ensinu superior.

Fator determinante formasaun edukasaun nee hahu husi ensinu basiku. Ensinu baziku laiha ona kualidade mak lalika mehi atu ensinu sira tuir mane bele forma ema matenek, ai ida moris mai kuandu la halo los mak boot mai se kleuk.

Agora ba haree kondisaun real ensinu baziku, li-liu ensinu baziku publiku, menus fasilidade, karteiras, mejas, pior liu laiha bilioteka no mos laboratoriu atu uza ba pratika no mos laiha aktividade extra kurikuler no ‘les’ iha eskola.

Eskola publiku balu iha bilioteka, iha livru maibe biblioteka taka 24 jam, la fo impresta ba alunu sira, tauk atu nakles ka lakon, libru sira konserva deit too dodok, profesor sira mos la fo trabalho de casa nebe prefere ba libru sira nee.

Ohin loron nee eskola oan sira laiha kultura le tamba edukasaun rasik lakria kultura le iha eskola sira hodi nunee eskola oan sira prefere liu ba halimar Facebook, whatsaap rede sosial sira seluk no mos haree filme telenovela.

Iha matenek ida mak hatete hanesan nee ‘orang yang pintar dan orang yang kaya adalah orang yang banyak membaca buku’, iha timor leste nee ema porcento hirak mak le livru, ema nain hirak mak loron loron kaer livru iha liman hodi le? No loron ida nia le livru hira?, estudante hirak mak uza ninia tempo barak ba le? menus teb-tebes.

Atu ensinu iha futuru mai bele iha kualidade mak eskola ida idak tenki iha kultura le, aumenta aktividade extra kurikuler iha esloka, les no funsiona maximu biblioteka no laboratoriu ba pratika.

Kualidade ensinu la depende ba meja ka karteira maibe oinsa Ministeriu Edukasaun fo insentiva ba eskola sira hodi bele funsiona aktividade sira nebe mensiona nee iha eskola ida idak, se lae, tinan ba tinan estadu ninia mehi ba kualidade ensinu nee sei la atinji, pior liu tan halo edukasaun mais fraku.*

Publicada por TIMOR AGORA