Hafoin remata jogu kampionatu Liga
Futebol Amadora (LFA) husi feze apuramentu, primeiru divizaun no segundo
divizaun ba époka 2015/2016 ne’ebé la’o ho susesu no marka historia futebol
permanente iha Timor Leste, Prezidenti
Porto Taibesse, Martinho Sequeira, hatete, Prezidente Liga Futebol Amadora
(LFA), Nilton Gusmão iha posibilidade lidera Federação Futebol de Timor Leste
(FFTL).
Martinho Sequeira, afirma, susesu liga
futebol reguler ne’ebé foin pela primeira ves akontese iha Timor Leste ne’e la
sés husi esforsu Prezidente LFA, Nilton Gusmão ho nia estrutura tomak nomos
kontribuisaun entidade relevantes no komunidade mak hadomi desportu futebol.
Tanba ne’e, Nilton iha kapsidade atu lidera federasaun.
Ho susesu kampionatu futebol reguler
ne’ebé ho karakter amadora ne’e involve klubu 21, hahú nia kompetisaun iha
05/12/2016 no remata iha 31/07/2016 foin lalais ne’e, konsege loke odamatan no
iha posibilidade bo’ot ba prezidente LFA atu bele okupa ka tur ba kadeira
primeiru (Prezidente) wainhira FFTL loke oportunidade liu husi kongresu ne’ebé
tuir planu atu hala’o iha fulan Setembro oin mai tinan 2016 ne’e.
Prezidenti Porto Taibesse, Martinho
Sequeira, haktuir tan katak, hafoin susesu LFA, ne’e mosu iha indikasaun
publiku katak Prezidenti Nilton Gusmão figura ne’ebé diak atu hakat ba lidera
FFTL tanba nia hatudu ona kapasidade organiza no iha koñesimentu klean ba
Futebol.
“Senhor Nilton figura ida diak, ne’ebé
mak ita hotu haree ona no konsidera katak nia rezultadu iha ona, tanba lidera
LFA la’o ho sussesu no partisipasaun ema hotu nian ne’ebe mak servisu maka’ás
fo suporta ba liga ne’e to’o remata,”informa Martinho Sequeira ba jornalista
sira via telefone, Tersa (02/08/2016).
“Nilton hanesan figura ida mak ita
kompera ba ema sira ne’ebé mak ita hotu haree hamutuk, ne’e la iha ema ruma mak
bele kompete ho nia (Nilton), tanba Nilton ema ida que potensial tebes, no ema
ida ne’e mak hadomi futebol, tanba uluk kedas nia mos iha klubu, no nia
(Nilton) iha vizaun ne’ebé diak no buat barak ne’ebé nia iha atu nune’e ita
konvense lori nia ba kompete iha kongresu FFTL,”realsa Martinho.
Nia esplika, presiza haree mos ba
estatutu federasaun ne’ebé liga ba FIFA , nune’e rekezitus saida mak presiza
submete no bele avansa ba oin.
“ Ita atu kompete iha FFTL presiza haree
lai estatutu federasaun, rekezitus saida deit mak bele iha atu ema bele kompete
iha FFTL, no konseteza wainhira Senhor Nilton prontu atu ba kompete, husi parte
klubu Porto Taibesse FC suporta maka’ás tebes tanba ami sei laharee tan ba
figura seluk,”dehan nia.
Hatan ba espetativa publiku nian hakarak
Nilton Gusmão lidera FFTL ne’e, Prezidenti LFA, Nilton Gusmão, hatete, objetivu
final husi LFA loke kompetisaun ne’e la’os iha ambisaun atu lidera FFTL no
núdar individual laiha ambisaun mos atu ba lidera FFTL.
“Buat hotu ne’e la’ós objetivu final
husi liga nian, maibe objetiviu LFA mak oinsa organiza futebol iha Timor atu
nune’e ita nia Joven sira involve iha futebol, tanbe ne’e LFA iha Federasaun
nia okos nune’e bele servisu hamutuk no organiza liga ne’e iha
tinan-tinan,”dehan Nilton iha Estadíu Munisipal Dili.
“Hau laiha ambisaun no deklara lolos
katak sedu demais atu ba lidera FFTL, sedu demais atu dehan ba tur iha FFTL,
ha’u nia apoiu total ba aktual Prezidenti FFTL señor Francisco Calbuadi Lay,
nia (Calbuadi) núdar mos figura ne’ebé importante iha federasaun tanba ne’e ita
buka atu apoiu malu la’ós atu mai buka hatun malu, sukit malu no estraga malu
iha futebol,” hatutan Nilton.
Antes ne’e koordenador jeral AMANTES
José Carvalho informa, relasiona ho susesu LFA ne’e tempu to’o ona ba
aktividade futebol ne’e fila ba nia hun tanba ne’e FFTL presiza halo ona kongresu
nune’e hahú fó fali oportunidade ba jerasaun foun hodi substitui no okupa fatin
haesan prezidenti FFTL Francisco Kalbuadi Lay ho nia vise sira.
Haree ba prosesu futebol iha rai laran,
Liga Futebol Amadora mos agora la’o ona, klubu sira tenta para atu harii
asosiasaun klubus, asosiasaun treinadores, asosiasaun arbitrajen. tanba ne’e
asosiasaun hirak ne’e mak iha direitu konvoka atu halo kongressu no tur iha
kongresu nia laran.Ito
Jornal Nacional
Publicada por TIMOR AGORA
Nenhum comentário:
Postar um comentário