LERE : EURICO NIA OAN IHA DIREITU TRATAMENTU SAUDE BA RAI LIUR

Xefe Estadu Maior General Falintil-Forsa Defesa Timor Leste (F-FDTL), Maijor Jeneral Lere Anan Timur hatete, Governu haruka otonomista Eurico Guterres ninia oan, Ronaldo Miguel Guterres ba hala’o tratamentu saude iha Singapura, tanba haree nudar Timor no ran Timor nian iha direitu hetan salvasaun ba ninia vida.

Pasiente Ronaldo M. Guterres sofre moras pankreas tumor nune’e hala’o tratamentu saude iha Hospital Nasional Guido Valadares (HNGV), maibe labele halo tratamentu iha Timor tenke hala’o tratamentu iha rai liur.

“Ha’u bele dehan hanesan ne’e, nudar ema, nudar Timor nia ran Timor nian, nia mos iha direitu atu salva nia vida,”Lere Anan Timur ba Jornalista iha Kuartel Jeneral, F-FDTL-Fatuhada, Segunda (01/08/2016) relasiona polimika konaba Hospital Nasional Guido Valadares (HNGV)  rekomenda haruka pasiente refere ba halo tratamentu mediku iha rai liur.

Lere hateten, wainhira sidadaun ida moras iha direitu hetan tratamentu saude, maske nia otonomista nia oan, tanba sala ne’e   laos ninia oan, maibe ninia aman Eurico Guterres mak halo sala.

“Purizemplu ha’u nia saude diak, otonomista ninia oan ida atu besik mate agora tenke fo perioridade ba ita nia maluk ne’ebe mak atu mate ne’e, ita bele dehan Eurico mak sala ninia oan la sala ita tenke komprende buat ne’e hanesan ne’e,”esklarese Lere. Eus

Jornal Nacional

Publicada por TIMOR AGORA