FORSA ESPESIAL PREPARA BA AMEASAS TERORIZMU

DILI - Forsa espesiál ne’ebé maka harii hosi FALINTIL-Forsa Defeza Timor Leste (F-FDTL) prepara hasoru ameasas terorizmu ne’ebé maka karik iha futuru akontese iha Timor-Leste.

Xefi Estadu Maiór Jenerál FALINTIL-Forsa Defeza Timor Leste (F-FDTL), Majór Jenerál Lere Anan Timor dehan, forsa espesiál ne’e harii atu bele prepara ba ameasas terorista nia ne’ebé maka karik iha futuru akontese.

“Nia misaun ita nia polítiku sira maka deside ona katak anti terorista, defende nasaun ida ne’e maka ita nia objetivu,” dehan Lere ba jornalista sira iha Kuartél Jenerál F-FDTL, Fatuhada, Sábadu (20/8).

Nia hatutan, forsa espesiál foin maka nia númeru kiik oan ida, seidauk loos, tinan ida rua tan, forsa espesiál sei halo buat ruma agora sira sei treinu báziku hela.

Antes ne’e, eis Ministru Defeza Seguransa (MDS) Xanana Gusmão dehan, atu bele antisipa hosi ameasas terorismu nian ne’ebé maka hahú namanas iha mundu.

“Ita tenki prepara ba dezáfius mundu nian, tanba ne’e maka iha forsas no iha mós forsa espesiál ida,” dehan Xanana liu hosi nia diskursu ba serimónia entrega ekipamentu pezadu iha Kuartél Jenerál F-FDTL Fatuhada, Kuarta (10/8).

Nia hatutan, iha ema balun dehan besik ona eleisaun ne’e maka Xanana harii forsa espesiál ne’e, ema sira hanoin hanesan ne’e beik-ten, la akompaña evolusaun iha mundu ohin loron nian.

“Ema balun dehan forsa espesiál ne’e Xanana nian, tanba 2017 iha eleisoens, ema sira ko’alia hanesan ne’e ema beik-ten, tanba la kompriende estadu, la kompriende mundu, la kompriende dezáfius ne’ebé maka mosu oin nusá maka  Estadu Timor Leste bele responde ba iha ne’ebá,” dehan Xanana.

Nia hatutan, TL no mundu la livre hosi ameasas terorismu, ho ameasas oi-oin, tanba ne’e maka tenki prepara uluk antes buat ruma mosu, prontu ona bele hatán ho di’ak, forsa espesiál ne’e iha kompañia ida. (way)

Timor Post

Publicada por TIMOR AGORA