Oknum PNTL Liman Mamar ba F-FDTL, Komandu Rua Hatuun Ekipa, Investiga Kazu Maliana

DILI - Kazu membru Polísia Nasionál Timor –Leste (PNTL) Unidade Espesiál Polísia (UEP) hosi Bataliaun Ordem Públiku (BOP) baku membru FALINTIL-Forsa Defeza Timor –Leste (F-FDTL) komandu rua hatuun ona ekipa investigasaun konjunta hodi investiga kazu refere.

Komandante Jerál PNTL, Komisáriu Júlio da Costa Hornay dehan, kazu ne’e komandu rua hatuun ona ekipa investigasaun konjunta ba hala’o investigasaun, nune’e bele hatene loloos sé maka sala no loos iha kazu refere.

“Sira ekipa konjunta kazu Laulara nian maka kontinua de’it halo investigasaun, ami renova de’it despaisu,” Komisáriu Júlio informa ba jornalista sira iha Kuartél Jenerál, F-FDTL Fatuhada, Sábadu (20/8).

Nia hatutan, hamutuk tiha para investiga membru PNTL ho F-FDTL gosta baku-malu, depois maka foin foti medidas, tanba maka presiza tempu oituan hodi bele investiga.

Antes ne’e, Xefi Estadu Maiór Jenerál F-FDTL, Majór Jenerál Lere Anan Timor dehan, di’ak liu komandu PNTL hasai tiha membrus ne’ebé maka hakarak estraga instituisaun rua ne’e nia naran.

“Ha’u dehan de’it di’ak liu hasai tiha membru ne’ebé maka hakarak estraga instituisaun rua, iha F-FDTL hanesan ne’e ha’u hasai kedas,” dehan Lere ba jornalista sira iha Kuartél Jenerál, F-FDTL, Fatuhada, Sesta (19/8).

Lere hatutan, situasaun ida henesan komandu rua labele tolera ona hahalok membrus  nian, tanba instituisaun rua ne’e maka lutu ba nasaun, loloos tenke hatudu atetude ne’ebé maka di’ak, nune’e komunidade sira bele tuir.

“Komandu PNTL tenke toma medidas ne’ebé maka forte ba nia membru, nune’e labele pertubu komandu rua ne’e, Maliana nian, ha’u haruka ona grupu mistu ida ba para halo investigasaun, para mai halo nia prosesu, no tama ona ba agresaun fíziku lori ba Tribunál,” dehan Lere.

Nia esplika, ba oin maka karik membru F-FDTL maka halo hanesan PNTL nian nia sei hasai, komandu PNTL mós tenke halo hanesan ne’e, tanba akontesementu ba membru F-FDTL ne’e la’ós maka foin akontese, maibé akontese dala barak ona.

 “Iha Militár ita nia membrus balun mós sei joven ita lakohi para buat ruma akontese, uluk dehan Lorosa’e-loromonu agora fali dehan F-FDL ho PNTL, ha’u hanoin komandu PNTL tenke foti medidas forte la nesesáriu duni sai tiha, ha’u mós hanesan ne’e,” dehan Lere.

Jenerál Fitun Rua ne’e Lakohi para ema iha instituisaun nia laran estraga fali nasaun, ho ema ida rua nia hahalok, Kuandu membru F-FDTL maka konsiente ka lae komete krime rua nia hasai.

Kazu membru BOP baku membru F-FDTL ida iha Maliana, Munisípiu Bobonaro iha loron Kinta (18/8).

Maibé Jenerál Lere seidauk bele esplika detallu kona-ba kazu refere, tanba oras ne’e ekipa ida halo prosesu investigasaun.(way) 

Timor Post

Publicada por TIMOR AGORA