PREZIDENTI REPÚBLIKA HUSU PN DESKUTI LEI RAI HO ULUN MALIRIN

DILI (ANTIL) – Prezidenti Repúblika husu Parlamentu Nasionál (PN) atu deskute Lei Rai ho ulun malirin, para lei ne´e bele fó resposta ba ema hotu nia espetativa.

“Ita boot sira hatene katak iha levantamentu lubuk ida maka foti hanesan kazu relasaun ho títlu rai ninian iha teritóriu TL laran tomak. Ezemplu iha Dili no Ermera ninian, iha entidade lubuk ida maka hato´o petisaun hasoru rejime Lei Rai ninian,” Prezidenti Parlamentu Nasionál, Aderito Hugo da Costa, haktuir lia-menon ne´e ba jornalista sira iha Palásiu Prezidensiál, Bairu-Pité, Segunda (01/08), hafoin ramata inkontru ho Prezidenti Repúblika, Taur Matan Ruak.

En-prinsípiu, nia dehan, Prezidenti Repúblika hakarak iha lalais Lei Rai para define títlu rai ninian.

Hugo informa iha Primeiru Governu kedas governu aprezenta Programa Kadastru, tan ne´e ita iha ona Sistema Kadastru Nasionál ne´ebé estabelese hosi governu hala´o ona programa ida dijitalizasaun ba estatutu rai nian hahú hosi kapitál Dili to´o iha distritu.

“Ita hein katak buat rua ne´e la´o dala ida. Bainhira Sistema Polítika Kadastru no Rejime Bens Imóveis ne´ebé defini títlu rai ninian la´o dala ida, iha ona kondisaun ba ema ne´ebé hetan ona títlu rai nian fasilmente asesu sertifikadu rai,” nia esklarese.

Hugo hateten rezime kolonialista, rezime okupasaun Indonézia no rezime pós independénsia ninian kria hela kondisoens lubuk ida para depois ita tama iha títlu rai nian tenki deskuti ho kuidadu. Tanba ne´e, nia tenik, Parlamentu akompaña ho sériu ba deskusaun espesialidade Lei Rai ninian.

Iha biban ne´e, Prezidenti Parlamentu Nasionál, Aderito Hugo da Costa mós informa atividade Parlamentu Nasionál ninian ba Prezidenti Repúblika, Taur Matan Ruak. Nia dehan katak Parlamentu Nasionál dezde 16 Jullu resesu maibé Komisaun Permanente kontinua hala´o serbisu hanesan baibain to´o iha 15 Setembru.

Nia mós konvida Prezidenti Repúblika atu halo abertura ba última Sesaun Lejizlativa iha Terseira Lejizlatura ninian, 15 Setembru mai ne´e. Hugo mós hato´o ba Prezidenti Repúblika kona-ba serbisu ne´ebé oras ne´e progresu tebes iha Parlamentu Nasionál hanesan Lei Rai no Lei Ordenamentu Teritóriu.

Nia esplika katak Lei Rai ne´e aprovadu ona iha jeneralidade no oras ne´e tama ona iha deskusaun espesialidade iha Komisaun A trata asuntu Lejizlasaun. (Jornalista: Xisto Freitas/Editór: Gantry Meilana)

ANTIL

Publicada por TIMOR AGORA